Á næsta föstudag, 11. maí,  verður okkar árlega sveitaferð. Farið verður að Bjarteyjarsandi í Hvalfjarðarsveit eins og mörg undanfarin ár. Við lendum í sauðburði, skoðum kisur, hunda, hesta og hænur, förum í leiki og í fjöruna. Öll börn og starfsmenn skólans fara og bjóða foreldrum og systkinum með (þeim sem geta) og margir hafa nýtt sér það því það er alltaf mjög gaman í þessari ferð. Lagt er af stað klukkan 9:00 um morguninn og áætlaður heimkomutími er 14:30. Foreldrafélagið greiðir fyrir rúturnar og gjaldið til bóndans fyrir starfsmenn og börn en gestir greiða 1000 kr. hver. Skólinn býður upp á grillaðar pylsur fyrir alla í hádeginu og ávaxtabita og bændurnir upp á mjólk að drekka með. Skráningalistar fyrir þá sem ætla með eru í fatherbergjum skólans og verða teknir niður að morgni þriðjudagsins 8. maí.

Nú fer í hönd töluverð aðlögun barna í Arnarsmára. Eins og komið hefur fram byrjaði Gulldeildin í síðustu viku og við það fækkaði börnum á Akri og Brekku. Við nýtum okkur það og í dag byrjuðu nokkur börn af Bakka og Engi í aðlögun á eldri deildunum. Mánudaginn 21. maí byrja svo nokkur ný börn hjá okkur og dreifast þau á allar deildir skólans.

Það er búinn að vera mikill spenningur hjá Gullmolunum  og mikið að gera því Gulldeildin tók formlega til starfa í dag. 
Gulldeildin hefur aðsetur í Hreyfisalnum og var haldinn þar fundur með börnunum í morgun og farið yfir hvað þarf að ná í til að salurinn verði að deild. Það þurfti að ná í borð og stóla og eitthvað af leikefni. Eftir að komið var í ljós hvað þyrfti fóru börnin í að sækja það og koma fyrir. Sigga er deildarstjóri Gulldeildar og Ísak Már íþróttakennari verður meðkennari hennar í sumar.

Í dag er dagur umhverfisins og af því tilefni tóku börn og kennarar í Arnarsmára sig til og fegruðu sitt nánasta umhverfi. Skólalóðin var hreinsuð og hennar nánasta umhverfi. Allir voru mjög áhugasamir og iðjusamir og ríkti gleði í hópnum. Að lokinni mikilli vinnu voru grillaðar pylsur úti og tók þreytt og sælt vinnufólk hraustlega til matar síns.